ໜ້າຫຼັກ / ການເຄື່ອນໄຫວ / ຮອງລັດຖະມົນຕີ ກະຊວງ ຖວທ ຕ້ອນຮັບ ຄະນະສະມາຄົມນັກຂ່າວໜັງສືພິມ ແຫ່ງປະເທດໄທ
ຂປລ. ວັນທີ 8 ພະຈິກ 2023 ນີ້, ທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງຄະນະສະມາ ຄົມ ນັກຂ່າວໜັງສືພິມ ແຫ່ງປະເທດໄທ ນຳໂດຍ ທ່ານ ມົງຄຸນ ບາງປຣະພາ ປະທານສະມາຄົມ ນັກຂ່າວໜັງສືພິມ ແຫ່ງ ປະເທດໄທ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.
ໂອກາດນີ້, ທ່ານ ໂພສີ ແກ້ວມະນີວົງ ກໍໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ທີ່ ທ່ານ ມົງຄຸນ ບາງປຣະພາ ພ້ອມຄະນະ ທີ່ເດີນທາງມາເຄື່ອນໄຫວວຽກງານໃນຄັ້ງນີ້, ຊຶ່ງເປັນການປະກອບສ່ວນສຳຄັນ ເຂົ້າໃນການເສີມຂະຫຍາຍ ການພົວພັນການຮ່ວມມື ລະຫວ່າງປະເທດ ໂດຍສະເພາະ ດ້ານການຮ່ວມມືໃນ ຂົງເຂດວຽກງານສື່ມວນຊົນ, ວຽກການຂ່າວ ແລະ ການພັດທະນາ ບຸກຄະລາກອນ ພາຍໃຕ້ການຝຶກອົບຮົມ ໂດຍການການຮ່ວມມືກັນ ທັງສອງສະມາຄົມນັກຂ່າວ ລາວ ແລະ ໄທ ໃຫ້ນັບມື້ມີການຂະຫຍາຍຕົວຍິ່ງໆຂຶ້ນ.
ທ່ານ ມົງຄຸນ ບາງປຣະພາ ກໍໄດ້ສະແດງຄວາມຂອບໃຈ ມາຍັງ ທ່ານຮອງລັດຖະມົນຕີ ທີ່ໄດ້ ໃຫ້ການຕ້ອນຮັບ ພ້ອມທັງໄດ້ລາຍງານໃຫ້ຊາບ ກ່ຽວກັບຜົນຂອງການພົບປະ ແລະ ການຢ້ຽມຢາມ ເຮັດວຽກຮ່ວມກັນ ຂອງທັງສອງສະມາຄົມນັກຂ່າວລາວ-ໄທ. ພ້ອມນີ້, ກໍໃຫ້ຄຳສັນຍາວ່າ ຈະສືບຕໍ່ ສົ່ງເສີມວຽກງານດ້ານສື່ມວນຊົນ, ດ້ານການຂ່າວ, ການພັດທະນາບຸກຄະລາກ່ອນ ໂດຍເນັ້ນໃສ່ ການແລກປ່ຽນ ບົດຮຽນພາຍໃຕ້ ການຮ່ວມຂອງສອງສະມາຄົມນັກຂ່າວ ຈັດຝຶກອົບຮົມໃຫ້ແກ່ນັກຂ່າວ ລາວ ແລະ ໄທ ໃຫ້ມີປະສິດຕິພາບສູງຂຶ້ນ.
ໃນໂອກາດນີ້, ມົງຄຸນ ບາງປຣະພາ ພ້ອມຄະນະ ຍັງໄດ້ໄປຢ້ຽມຢາມໂທລະພາບ ນະຄອນຫລວງວຽງຈັນ (Vte9), ດ່ານສາກົນສິນຄ້າທ່າບົກ-ທ່ານາແລ້ງ ແລະ ເຂດໂລຈິດສະຕິກ ນະຄອນຫລວງ ວຽງຈັນ ຕື່ມອີກ.