ໜ້າຫຼັກ / ການເຄື່ອນໄຫວ / ລັດຖະມົນຕີ ຖວທ ຕ້ອນຮັບຮອງລັດຖະມົນຕີ ກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ
ຂປລ. ໃນວັນທີ 9 ທັນວາ 2024 ທີ່ນະຄອນຫລວງວຽງຈັນ, ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ຮວາງ ດາວ ເຄື່ອງ ຮອງລັດຖະມົນຕີ ກະຊວງວັດທະນະທຳ, ກິລາ ແລະ ທ່ອງທ່ຽວ ສສ ຫວຽດນາມ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ແລະ ຈັດຕັ້ງງານສັບປະດາວັດທະນະທໍາຫວຽດນາມ ຢູ່ ສປປ ລາວ ປະຈຳ ປີ 2024.
ໃນໂອກາດດັ່ງກ່າວ, ທ່ານ ນາງ ສວນສະຫວັນ ວິຍະເກດ ໄດ້ສະແດງຄວາມຕ້ອນຮັບອັນອົບອຸ່ນມາຍັງ ທ່ານ ຮວາງ ດາວ ເຄື່ອງ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ແລະ ຈັດຕັ້ງງານ ສັບປະດາວັດທະນະທໍາ ຫວຽດນາມ ຢູ່ ສປປ ລາວ ປະຈຳ ປີ 2024 ໃນຄັ້ງນີ້ ແລະ ຕີລາຄາສູງ ຕໍ່ການມາຢ້ຽມຢາມ ແລະ ການຈັດຕັ້ງງານສັບປະດາວັດທະນະທໍາ ຫວຽດນາມ ຖືວ່າແມ່ນການຈັດຕັ້ງຜັນຂະຫຍາຍ ແຜນການຮ່ວມມື ດ້ານສິລະປະ, ວັດທະນະທຳ ແລະ ທ່ອງທ່ຽວ ຂອງສອງກະຊວງ ວັດທະນະທຳ ແລະ ທ່ອງທ່ຽວ ລາວ-ຫວຽດນາມ ທັງເປັນການສະແດງໃຫ້ເຫັນເຖິງໄມຕີຈິດມິດຕະພາບອັນດູດດື່ມ ຖານສະຫາຍອ້າຍນ້ອງ, ຄວາມຮັກແພງສາມັກຄີມິດຕະພາບລາວ-ຫວຽດນາມ, ຫວຽດນາມ-ລາວ, ຊຶ່ງຖືເປັນການປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບທີ່ຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໂດຍສະເພາະ ສອງກະຊວງ ໃຫ້ນັບມື້ເຂົ້າສູ່ລວງເລິກ ແລະ ເກີດດອກອອກຜົນຢ່າງບໍ່ຢຸດຢັ້ງ.
ໂອກາດນີ້, ທ່ານ ຮວາງ ດາວ ເຄື່ອງ ກໍໄດ້ສະແດງຄວາມຂອບໃຈຕໍ່ ທ່ານ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ທີ່ໄດ້ໃຫ້ການຕ້ອນຮັບໃນຄັ້ງນີ້, ພ້ອມທັງຖືໂອກາດນີ້ ລາຍງານໂດຍຫຍໍ້ ກ່ຽວກັບແຜນການຢ້ຽມຢາມ ແລະ ການຈັດຕັ້ງງານສັບປະດາ ວັດທະນະທໍາຫວຽດນາມ ຢູ່ ສປປ ລາວ ປະຈຳ ປີ 2024 ໃຫ້ທ່ານລັດຖະມົນຕີໄດ້ຮັບຊາບ.
