ໜ້າຫຼັກ / ການເຄື່ອນໄຫວ / ໃນວັນທີ 22 ມັງກອນ 2025 ຫ້ອງການກະຊວງ ຖວທ ຈັດຝຶກອົບຮົມລະບົບຫ້ອງການທັນສະໄໝ E-Office ແລະ ແນະນໍາການຮ່າງເອກະສານທາງການ ໃຫ້ບັນດາກົມ, ກອງ ພາຍໃນກະຊວງ ຖວທ
ໃນວັນທີ 22 ມັງກອນ 2025 ຫ້ອງການກະຊວງ ຈັດຝຶກອົບຮົມລະບົບຫ້ອງການທັນສະໄໝ E-Office ແລະ ແນະນໍາການຮ່າງເອກະສານທາງການ ໃຫ້ບັນດາກົມ, ກອງ ພາຍໃນກະຊວງ ຖວທ ພາຍໃຕ້ການເປັນປະທານຂອງທ່ານ ບຸນເພັງ ສຸພາບ ຮອງຫົວໜ້າຫ້ອງການກະຊວງ ມີບັນດາທ່ານຫົວໜ້າພະແນກ, ຮອງຫົວໜ້າພະແນກ, ຫົວໜ້າຂະແໜງ, ຮອງຫົວໜ້າຂະແໜງ ແລະ ພະນັກງານ ວິຊາການ ຈາກບັນດາກົມ, ສະຖາບັນ, ວິທະຍາໄລ, ກອງ ທີ່ຂື້ນກັບກະຊວງ ລວມທັງໝົດ 50 ກວ່າທ່ານ.
ທ່ານຮອງຫົວໜ້າຫ້ອງການ ໄດ້ກ່າວວ່າຊຸດຝຶກອົບຮົມນີ້ ມີຄວາມໝາຍຄວາມສໍາຄັນຫລາຍ ເພາະລະບົບຫ້ອງການທັນສະໄໝ E-Office ນັ້ນ ເປັນວຽກໜື່ງທີ່ລັດຖະບານ ໃຫ້ຄວາມສໍາຄັນເພື່ອນໍາໃຊ້ເຂົ້າໃນກົນໄກການເຮັດວຽກຂອງລັດຖະບານ ຊຸດທີ IX ໃຫ້ມີຄວາມກະທັດຮັດ, ວ່ອງໄວ, ປະຫຍັດເວລາ ແລະ ປະຫຍັດຄ່າໃຊ້ຈ່າຍຕ່າງໆ. ບັນດາກະຊວງ, ກົມກອງ, ຂະແໜງການ, ໜ່ວຍງານຕ່າງໆກໍ່ໄດ້ເລີ່ມຫັນມານໍາໃຊ້ ເຂົ້າໃນວຽກງານນັບມື້ນັບຫຼາຍຂື້ນ ແລະ ແມ່ນວຽກທີ່ມີຄວາມຈໍາເປັນຕ້ອງໄດ້ເຮັດ, ຕ້ອງມີການພັດທະນາໄປຕາມຄວາມທັນສະໄໝຂອງສັງຄົມ, ຖ້າພວກເຮົາບໍ່ພັດທະນາບໍ່ນໍາໃຊ້ລະບົບເຕັກໂນໂລຊີທີທັນສະໄໝຄືກັບພາກສ່ວນອື່ນ ພວກເຮົາກໍ່ຈະຫຼ້າຫລັງບໍ່ທັນກັບຍຸກສະໄໝ,
ການຫັນເປັນດີຈິຕອນ ຫຼືວ່າ ການຫັນເປັນທັນສະໄໝ ແມ່ນການນໍາໃຊ້ເຕັກໂນໂລຊີດີຈິຕອນ ຢູ່ໃນທຸກຂົງເຂດການພັດທະນາເສດຖະກິດ-ສັງຄົມ ໃນຂອບເຂດທົ່ວປະເທດ ເພື່ອເຮັດໃຫ້ການຜະລິດ ແລະ ການພົວພັນການຜະລິດ ມີປະສິດຕິພາບ ແລະ ມີຄຸນະພາບໃໝ່ທີ່ດີຂຶ້ນກວ່າເກົ່າ. ການຫັນເປັນດີຈິຕອນ ແມ່ນຂະບວນວິວັດທີ່ເປັນທ່າອ່ຽງລວມຂອງໂລກ. ສະນັ້ນ, ການຫັນເປັນດີຈິຕອນຢູ່ ປະເທດເຮົາ ຈຶ່ງເປັນພາລະກິດປະຕິວັດທີ່ສໍາຄັນ ໃນການຫັນເປັນອຸດສາຫະກຳ ແລະ ທັນສະໄໝ ຕາມແນວທາງປ່ຽນແປງໃໝ່ຂອງພັກເຮົາ. ໂດຍສະເພາະແມ່ນຫ້ອງການທີປະຕິບັດໜ້າທີໃນຖານະເປັນເສນາທິການ, ເຮັດໜ້າທີ່ປະສານງານ, ບໍລິຫານ-ບໍລິການ ສ້າງສິ່ງອໍານວຍຄວາມສະດວກ, ເຮັດໜ້າທີເປັນໃຈກາງປະສານງານ ລະຫວ່າງຂັ້ນລຸ່ມກັບຂັ້ນເທິງ, ຂັ້ນເທິງກັບຂັ້ນລຸ່ມ ໃຫ້ສາມາດເຄື່ອນໄຫວວຽກງານໃຫ້ມີຄວາມຄ່ອງຕົວ ແລະ ໄດ້ຮັບຜົນສໍາເລັດ, ພ້ອມນັ້ນ, ບັນດາກົມກອງຕ່າງໆກໍ່ລ້ວນແລ້ວແຕ່ມີຄວາມຈໍາເປັນຕ້ອງໄດ້ຫັນເຂົ້າສູ່ຄວາມທັນສະໄໝ ນໍາໃຊ້ລະບົບເຕັກໂນໂລຊີເຂົ້າມາຮັບໃຊ້ວຽກງານ. ສະນັ້ນ, ໂດຍເຫັນໄດ້ຄວາມສໍາຄັນດັ່ງກ່າວ ແລະ ທັງເປັນການປະຕິບັດຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີສະບັບເລກທີ 628/ຫສນຍ, ລົງວັນທີ 10 ມິຖຸນາ 2021 ໂດຍສະເໜີໃຫ້ບັນດາກະຊວງ, ອົງການທຽບເທົ່າ ແລະ ອົງການປົກຄອງທ້ອງຖີ່ນ ຫັນການຈັດປະຊຸມ ແລະ ຫັນການນໍາສົ່ງເອກະສານທາງການໄປຜ່ານລະບົບທີ່ທັນສະໄໝ ໂດຍຜ່ານລະບົບ ຕ່າງໆ ຂອງແຕ່ລະພາກສ່ວນໃນຂອບເຂດທົ່ວປະເທດ ເພື່ອສະດວກໃນການນໍາສົ່ງເອກະສານຫາກັນ ເຮັດໃຫ້ວຽກງານຫ້ອງວ່າການ, ຫ້ອງການໃນຂອບເຂດທົ່ວປະເທດມີຄວາມເປັນເອກະພາບ, ມີການພັດທະນາໃນດ້ານຕ່າງໆໃຫ້ທັນສະໄໝ.
ພ້ອມດຽວກັນນີ້ ວຽກງານການຮ່າງເອກະສານທາງການ ກໍ່ເປັນວຽກງານທີ່ສໍາຄັນ ເພື່ອເຮັດໃຫ້ການຮ່າງເອກະສານທາງການນັ້ນ ມີປະສິດທິພາບ ຖຶກຕ້ອງຕາມຫຼັກການ, ເປັນເສນາທິການໃຫ້ແກ່ການນໍາແຕ່ລະຂັ້ນຂອງຕົນ ໃນວຽກງານເອກະສານທາງການ ເອກະສານທີ່ເຊັນອອກໄປນັ້ນ ຕ້ອງຮັບປະກັນຄວາມຖຶກຕ້ອງ, ມີເນື້ອໃນທີ່ອຸດົມສົມບູນ, ຊັດເຈນ, ເຊື່ອຖຶໄດ້, ສະນັ້ນຈື່ງຈໍາເປັນຕ້ອງໄດ້ມີການຈັດຝຶກອົບຮົມ, ແລກປ່ຽນບົດຮຽນນໍາກັນຕື່ມ ໃຫ້ມີຄວາມເປັນເອກະພາບກັນ
