ໜ້າຫຼັກ / ການເຄື່ອນໄຫວ / ສູນວັດທະນະທຳຈີນ ສະເຫຼີມສະຫຼອງບຸນກຸດຈີນ ປີ 2025
ສູນວັດທະນະທຳຈີນ ປະຈຳລາວ ໄດ້ຈັດກິດຈະກຳສະເຫຼີມສະຫຼອງບຸກກຸດຈີນປີ 2025 ຂຶ້ນໃນວັນທີ 17 ມັງກອນນີ້ ທີ່ສູນວັດທະນະທຳຈີນ ປະຈຳ ລາວ ໂດຍມີ ທ່ານ ວັນສີ ກົວມົວ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ຫົວໜ້າບັນນາທິການໃຫຍ່ ໜັງສືພີມປະຊາຊົນ, ທ່ານ ນາງ ຝາງຫົງ ເອກອັກຄະລັດຖະທູດ ສປ ຈີນ ປະຈຳ ລາວ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມ.
ທ່ານ ນາງ ຫຼີຢີ່ຜິງ ຫົວໜ້າສູນວັດທະນະທຳຈີນ ປະຈຳ ລາວ ກ່າວວ່າ: ກິດຈະກຳຄັ້ງນີ້ ພາຍໃຕ້ຫົວຂໍ້ ສະເຫຼີມສະຫຼອງບຸນກຸດຈີນ ແລະ ສຳຜັດວັດທະນະທຳຫູເປີຍທີ່ປະເທດລາວ, ຫູເປີຍ ເປັນແຫຼ່ງກໍາເນີດຂອງວັດທະນະທໍາສູ, ຜູ້ຄົນໃນທີ່ນີ້ ມີແຮງປາຖະໜາອັນແຮງກ້າຕໍ່ກັບການສະແຫວງຫາການດໍາດົງຊີວິດທີ່ດີຂຶ້ນ. ກ່ອນບຸນກຸດຈີນ ພວກເຂົາພາກັນຕິດກອນຄູ່, ເຈ້ຍຕັດ, ຮູບພາບບຸນປີໃໝ່ຈີນທີ່ປະຕູ ແລະ ປ່ອງຢ້ຽມ, ກະກຽມເຄື່ອງທູບໃນການສັກກາລະບູຊາບັນພະບູລຸດ ແລະ ກະກຽມຊາເພື່ອຕ້ອນຮັບແຂກ, ໃນມື້ບຸນ ຜູ້ຄົນຈະໄປຢ້ຽມຢາມ ແລະ ມອບຂອງຂວັນໃຫ້ກັນ, ພ້ອມທັງອວຍພອນໃຫ້ກັນ ແລະ ກັນກິດຈະກໍາ“ສະເຫຼີມສະຫຼອງບຸນກຸດຈີນຍັງໄດ້ສໍາຜັດວັດທະນະທໍາ ແຂວງຫູເປີຍທີ່ປະເທດລາວ” .
ການວາງສະແດງມໍລະດົກວັດທະນະທໍານາມມະທໍາຄັ້ງນີ້ ປະກອບມີ ທັງໝົດ 8 ລາຍການທີ່ຕາງໜ້າໃຫ້ກັບມໍລະດົກວັດທະນະທໍານາມມະທໍາຂອງແຂວງຫູເປີຍທີ່ກ່ຽວຂ້ອງຢ່າງໃກ້ຊິດກັບປະເພນີບຸນກຸດຈີນຄື: ການຕັດເຈ້ຍລາຍດອກໄມ້ ເມືອງສ້ຽວການ, ສິລະປະການເຮັດຊາຢູ້ລູ້ ເອິ່ນສື, ສິລະປະການເຮັດຊາດິນຈີ່ ຈ້າວຫຼີສຽວ, ການປັກແສ່ວຕ້າແຢ, ສິລະປະການເຮັດທູບສູຊ່ຽງ, ການປັ້ນແປ້ງເອີ້ໂຈ່ວ, ການຂຽນຕົວອັກສອນຈີນ, ສິລະປະພາບພິມບຸນກຸດຈີນ. ວິທີນີ້ຈະແບ່ງປັນວິໄສທັດທີ່ສວຍງາມຂອງປີໃໝ່ຈີນກັບປະຊາຊົນລາວ.
ທ່ານ ວັນສີ ກົວມົວ ໄດ້ກ່າວວ່າ: ໃນນາມກະຊວງ ຖວທ ແຫ່ງ ສປປ ລາວ, ການຈັດງານຄັ້ງນີ້ ແມ່ນມີຄວາມໝາຍສຳຄັນຫຼາຍ, ທັງເປັນການສະເຫຼີມສະຫຼອງບຸນກຸດຈີນ ທີ່ຖືກບັນທຶກເຂົ້າໃນລາຍຊື່ມໍລະດົກວັດທະນະທຳນາມມະທຳຂອງໂລກ ໂດຍອົງການອຸຍເນສໂກ ແລະ ຍັງເປັນການສົ່ງເສີມການແລກປ່ຽນວັດທະນະທຳລະຫວ່າງ ສປປ ລາວ ແລະ ສປ ຈີນ ໃຫ້ແໜ້ນແຟ້ນຍິ່ງຂຶ້ນ. ດັ່ງຄຳສຸພາສິດຈີນທີ່ວ່າ “ເພື່ອນບ້ານທີ່ດີ ມີຄ່າກວ່າຍາດຕິພີ່ນ້ອງທີ່ຢູ່ໄກ” ສາຍພົວພັນມິດຕະພາບລາວ-ຈີນ ໄດ້ມີມາແຕ່ບູຮານນະການ ແລະ ນັບມື້ນັບໄດ້ຮັບການເສີມຂະຫຍາຍໃຫ້ມີຄວາມສະໜິດສະໜົມ ແລະ ຮອບດ້ານ. ທ່ານ ສີຈິ້ນຜິງ ປະທານປະເທດ ສປ ຈີນ ແລະ ທ່ານ ທອງລຸນ ສີສຸລິດ ປະທານປະເທດ ສປປ ລາວ ຍັງໄດ້ເນັ້ນຢໍ້າເຖິງຄວາມສຳຄັນຂອງການເສີມສ້າງສາຍພົວພັນແບບຄູ່ຮ່ວມຊາຕາກຳລາວ -ຈີນ, ດັ່ງຄຳເວົ້າທີ່ວ່າ: “ສາຍພົວພັນລາວ-ຈີນ ແມ່ນການພົວພັນແບບຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ”.
ການຈັດກິດຈະກຳ “ສຳຜັດວັດທະນະທຳຫູເປີຍທີ່ປະເທດລາວ” ໃນຄັ້ງນີ້, ເປັນການນຳເອົາວັດທະນະທຳອັນອຸດົມສົມບູນ ແລະ ເປັນເອກະລັກຂອງແຂວງຫູເປີຍ ມາສູ່ສາຍຕາຂອງປະຊາຊົນລາວ. ບໍ່ວ່າຈະເປັນການສະແດງສິລະປະ, ດົນຕີ, ການວາງສະແດງມໍລະດົກວັດທະນະທຳນາມມະທຳ, ອາຫານພື້ນເມືອງ ແລະ ຜົນງານຮູບແຕ້ມ ລ້ວນແຕ່ສະທ້ອນໃຫ້ເຫັນເຖິງມູນເຊື້ອວັດທະນະທຳອັນເກົ່າແກ່ ແລະ ມີຊີວິດຊີວາ ຂອງແຂວງຫູເປີຍ ແລະ ກິດຈະກຳຄັ້ງນີ້ ບໍ່ພຽງແຕ່ເປັນການແລກປ່ຽນວັດທະນະທຳເທົ່ານັ້ນ, ແຕ່ຍັງເປັນການສະທ້ອນໃຫ້ເຫັນເຖິງສາຍພົວພັນອັນແໜ້ນແຟ້ນ ພາຍໃຕ້ກອບການຮ່ວມມື “ໜຶ່ງແລວ ໜຶ່ງເສັ້ນທາງ” ທີ່ນັບມື້ນັບມີຜົນສຳເລັດຢ່າງເປັນຮູບປະທຳ. ໃນຂອບ “ໜຶ່ງແລວ ໜຶ່ງເສັ້ນທາງ” ໂຄງການທາງລົດໄຟ ລາວ-ຈີນ ຊຶ່ງເປັນໂຄງການເຊື່ອມຈອດຍຸດທະສາດລະຫວ່າງສອງປະເທດ ໄດ້ກາຍເປັນເສັ້ນທາງແຫ່ງການພັດທະນາ, ເສັ້ນທາງແຫ່ງຄວາມຜາສຸກຂອງປະຊາຊົນ ແລະ ເສັ້ນທາງແຫ່ງມິດຕະພາບ ທີ່ນັບມື້ນັບໃກ້ຊິດຍິ່ງຂຶ້ນ.
ກິດຈະກຳຄັ້ງນີ້, ຈະເປັນຂົວຕໍ່ໃນການແລກປ່ຽນຮຽນຮູ້ຊຶ່ງກັນ ແລະ ກັນ, ເພີ່ມພູນຄວາມເຂົ້າອົກເຂົ້າໃຈ, ຄວາມຮັກແພງລະຫວ່າງປະຊາຊົນສອງຊາດ, ທັງຍັງເປັນການສົ່ງເສີມການທ່ອງທ່ຽວ ແລະ ການຮ່ວມມືໃນດ້ານຕ່າງໆ ລະຫວ່າງລາວ ແລະ ແຂວງຫູເປີຍໃນອະນາຄົດ, ດັ່ງຄຳສຸພາສິດລາວທີ່ວ່າ “ຮັກແພງກັນຄືເຂົ້າໜຽວຕິດກະຕິບເຂົ້າ”. ກິດຈະກຳ “ສະເຫຼີມສະຫຼອງບຸນກຸດຈີນ” ປີ 2025 ຈົ່ງປະສົບຜົນສຳເລັດຢ່າງຈົບງາມ, ສາຍພົວພັນມິດຕະພາບອັນເປັນມູນເຊື້ອ, ການຮ່ວມມືຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ ຈົ່ງໝັ້ນຄົງຂະໜົງແກ່ນ ແລະ ໄດ້ຮັບການເສີມຂະຫຍາຍ ດ້ວຍໝາກຜົນອັນໃໝ່ຢ່າງບໍ່ຢຸດຢັ້ງ.
