ໜ້າຫຼັກ / ການເຄື່ອນໄຫວ / ຄະນະບໍລິຫານງານຊາວໜຸ່ມກະຊວງ ວທ ໄດ້ຈັດກອງປະຊຸມສະຫຼຸບວຽກງານຊາວໜຸ່ມ ປີ 2025 ແລະ ແຜນການປີ 2026
ວັນທີ 15 ມັງກອນ 2026, ທີ່ວິທະຍາໄລສິລະປະແຫ່ງຊາດ ຄະນະບໍລິຫານງານຊາວໜຸ່ມກະຊວງ ວທ ໄດ້ຈັດກອງປະຊຸມສະຫຼຸບວຽກງານຊາວໜຸ່ມ ປີ 2025 ແລະ ແຜນການປີ 2026. ສະຫາຍ ລິດທິສັກ ວໍລະລາດ ເລຂາຄະນະບໍລິຫານງານຊາວໜຸ່ມ ກະຊວງ ວທ ໄດ້ເຜີຍແຜ່ເຊື່ອມຊຶມຜົນສຳເລັດ ກອງປະຊຸມໃຫຍ່ ຜູ້ແທນຊາວໜຸ່ມທົ່ວປະເທດ ຄັ້ງທີ IX ແລະ ໄດ້ລາຍງານຜົນສຳເລັດທີ່ພົ້ນເດັ່ນຂອງຊາວໜຸ່ມກະຊວງທີ່ໄດ້ຈັດຕັ້ງປະຕິບັດໃນປີ 2025 ຊຶ່ງຊາວໜຸ່ມທົ່ວກະຊວງໄດ້ເປັນກຳລັງແຮງໃນການເຂົ້າຮ່ວມຂະບວນການລະດັບຊາດຢ່າງຟົດຟື້ນ ເປັນຕົ້ນແມ່ນ 3 ວັນປະຫວັດສາດຢ່າງມີຄວາມໝາຍ, ງານມະຫາກຳກິລາແຫ່ງຊາດ, ພົ້ນເດັ່ນກໍແມ່ນການສວນສະໜາມສະເຫຼີມສະຫຼອງວັນຊາດ ຄົບຮອບ 50 ປີ, ວັນສຳຄັນຂອງພັກ-ຂອງຊາດ. ໃນພິທີ ທ່ານ ຄຳເພົ້າ ວັນນະວົງ ຄະນະປະຈຳພັກກະຊວງ, ຫົວໜ້າກົມກວດກາ ໄດ້ໂອ້ລົມຊີ້ນຳໃຫ້ປີ 2026 ນີ້ ຊາວໜຸ່ມຕ້ອງສ້າງເວທີແຂ່ງຂັນສິລະປະ, ການປະດິດຄິດແຕ່ງກາບກອນ, ການຮຽນຮູ້ເລື່ອງປັນຍາປະດິດ(AI),ຈັດງານພົບປະຕະຫຼາດນັດຊາວໜຸ່ມ ແລະ ອື່ນໆ. ເພື່ອສ້າງຄວາມສາມັກຄີ, ສ້າງຂະບວນການຊາວໜຸ່ມໃຫ້ຟົດຟື້ນຍິ່ງຂຶ້ນ ລວມທັງສົ່ງເສີມສິລະປະ ແລະ ການທ່ອງທ່ຽວ. ທັງນີ້, ທ່ານຍັງໄດ້ຮຽກຮ້ອງໃຫ້ຊາວໜຸ່ມເປັນເຈົ້າການຕ້ານປະກົດການສິ່ງຫຍໍ້ທໍ້, ມຸ່ງໝັ້ນສ້າງຖັນແຖວ "ຊາວໜຸ່ມ 4 ບຸກ" ໃຫ້ກາຍເປັນກະດູກສັນຫຼັງທີ່ເຂັ້ມແຂງໃນການປົກປັກຮັກສາວັດທະນະທຳ ແລະ ສົ່ງເສີມການທ່ອງທ່ຽວໃຫ້ຍືນຍົງ ເພື່ອພັດທະນາປະເທດຊາດໃຫ້ຮຸ່ງເຮືອງສີວິໄລ.
