ໜ້າຫຼັກ / ການເຄື່ອນໄຫວ / ກະຊວງວັດທະນະທຳ ແລະ ການທ່ອງທ່ຽວ ຈັດພິທີປະກາດການຈັດຕັ້ງພະນັກງານການນຳຂັ້ນສູງ ແລະ ພະນັກງານນຳພາ-ຄຸ້ມຄອງ
ວັນທີ 16 ກໍລະກົດ 2026 ກະຊວງວັດທະນະທຳ ແລະ ການທ່ອງທ່ຽວ (ວທ) ໄດ້ຈັດພິທີປະກາດພະນັກງານການນຳຂັ້ນສູງ ແລະ ພະນັກງານນຳພາ-ຄຸ້ມຄອງ ຢ່າງເປັນທາງການ ໂດຍການເປັນປະທານຂອງ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ວທ ພ້ອມດ້ວຍ ພະນັກງານຫຼັກແຫຼ່ງພາຍໃນກະຊວງເຂົ້າຮ່ວມ. ພິທີໄດ້ຜ່ານດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງ ສະຫາຍ ພະຂັນໄຊ ສີຄັນໄຊ ຫົວໜ້າກົມຈັດຕັ້ງ ຂຶ້ນເປັນ ຮອງລັດຖະມົນຕີ ກະຊວງ ວັດທະນະທຳ ແລະ ການທ່ອງທ່ຽວ ຜູ້ໃໝ່ ພ້ອມທັງຜ່ານແຈ້ງການຂອງຄະນະຈັດຕັ້ງສູນກາງພັກ ວ່າດ້ວຍການແຕ່ງຕັ້ງ ທ່ານ ບ້ຽວ ໄຊຍະວົງ ຮອງຫົວໜ້າກົມຈັດຕັ້ງ ຂຶ້ນເປັນ ຮັກສາການແທນຫົວໜ້າກົມຈັດຕັ້ງ ກະຊວງ ວທ ເພື່ອປັບປຸງກົງຈັກການຈັດຕັ້ງໃຫ້ແທດເໝາະກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ໃນໂອກາດອັນມີຄວາມໝາຍນີ້ ທ່ານ ລັດຖະມົນຕີ ໄດ້ກ່າວໂອ້ລົມ ໂດຍສະແດງຄວາມເຊື່ອໝັ້ນຢ່າງສູງ ແລະ ເນັ້ນໜັກໃຫ້ສືບຕໍ່ເສີມຂະຫຍາຍບົດຮຽນການນຳພາ, ເປັນເຈົ້າການນຳພາ-ຊີ້ນຳ ບົນພື້ນຖານຄວາມສາມັກຄີເປັນເອກະພາບ, ເຮັດແບບແຜນກົນໄກການເຮັດວຽກໃຫ້ສອດຄ່ອງ ເພື່ອຮັບປະກັນການເປັນເສນາທິການທີ່ເກັ່ງໃຫ້ແກ່ຄະນະນຳ ແລະ ຮ່ວມກັນຂັບເຄື່ອນວຽກງານ ວທ ໃຫ້ມີຜົນສຳເລັດອັນຍິ່ງໃຫຍ່ຂຶ້ນກວ່າເກົ່າ.
