ກອງປະຊຸມດັ່ງກ່າວ ໄດ້ຈັດຂຶ້ນພາຍໃຕ້ຫົວຂໍ້ “ການມີສ່ວນຮ່ວມຢ່າງທົ່ວເຖິງ ແລະ ຍືນຍົງ” ໂດຍການເປັນປະທານຂອງ ທ່ານ ດາໂຕະ ສຣິ ຕິຢອງ ຄິງ ຊິງ, ລັດຖະມົນຕີກະຊວງທ່ອງທ່ຽວ, ສິລະປະ ແລະ ວັດທະນະທຳ ແຫ່ງ ມາເລເຊຍ ເຊິ່ງມີບັນດາລັດຖະມົນຕີ, ຮອງລັດຖະມົນຕີ, ຜູ້ຕາງໜ້າສະພາວັດທະນະທຳ-ສັງຄົມອາຊຽນ, ຕີມໍແລັສ໌ເຕ ແລະ ເລຂາທິການໃຫຍ່ອາຊຽນ ເຂົ້າຮ່ວມຢ່າງພ້ອມພຽງ. ກອງປະຊຸມ ແມ່ນເພື່ອທົບທວນຄືນໝາກຜົນ ແລະ ສິ່ງທ້າທາຍໃນການຈັດຕັ້ງປະຕິບັດແຜນຍຸດທະສາດ ຂອງປະຊາຄົມວັດທະນະທໍາ-ສັງຄົມ ໃນໄລຍະຜ່ານມາ, ລວມທັງ ແລກປ່ຽນ ຄໍາຄິດຄວາມເຫັນຕໍ່ທິດທາງແຜນການຍຸດທະສາດໃໝ່ ຫຼັງ 2025 ຂອງປະຊາຄົມວັດທະນະທຳ-ສັງຄົມອາຊຽນ ແລະ ປຶກສາຫາລືບາງບັນຫາສຳຄັນອື່ນໆ ຈໍານວນໜຶ່ງ ທີ່ເປັນວຽກຈຸດສຸມ ເປັນຕົ້ນແມ່ນ ການສ້າງຄຸນຄ່າດ້ານມໍລະດົກ ແລະ ວັດທະນະທໍາ; ການສົ່ງເສີມວຽກງານປັນຍາປະດິດ, ການຫັນເປັນດີຈິຕອນ ແລະ ວຽກງານສີຂຽວ ເພື່ອເສີມສ້າງທັກສະ ແລະ ຄວາມສາມາດໃຫ້ແກ່ອາຊຽນໃນອະນາຄົດ; ຂໍ້ລິເລີ່ມດ້ານສາທາລະນະສຸກ ເພື່ອຄວາມສົມບູນພູນສຸກຂອງອາຊຽນ; ການສົ່ງເສີມທ່າແຮງບົ່ມຊ້ອນຂອງຊາວໜຸ່ມ ແລະ ກິລາ ເພື່ອສົ່ງເສີມການຈະເລີນເຕີບໂຕ, ຄວາມສາມັກຄີປອງດອງ ແລະ ຄວາມເປັນເລີດ; ການສົ່ງເສີມມາດຕະການດ້ານສະພາບອາກາດເພື່ອການຄຸ້ມຄອງ, ການເປັນຄູ່ຮ່ວມ ແລະ ການເປັນເຈົ້າການ. ຄຽງຄູ່ກັນນີ້, ກອງປະຊຸມຍັງໄດ້ພ້ອມກັນຄົ້ນຄວ້າຕົກລົງ ຮັບຮອງເອົາ ເອກະສານສໍາຄັນ ຈຳນວນ 19 ສະບັບ, ໃນນັ້ນ ປະກອບມີ 5 ສະບັບ ເພື່ອຮັບຮອງ ແລະ 14 ສະບັບ ເພື່ອຮັບຊາບ ໂດຍຜູ້ນຳອາຊຽນໃນກອງປະຊຸມສຸດຍອດອາຊຽນ ຄັ້ງທີ 47.

ໃນກອງປະຊຸມຄັ້ງນີ້, ທ່ານລັດຖະມົນຕີ ໄດ້ສະແດງຄວາມເປັນເອກະພາບຕໍ່ ແຜນບູລິມະສິດການເປັນປະທານອາຊຽນຂອງມາເລເຊຍ 2025 ຊຶ່ງເຫັນໄດ້ວ່າມີຄວາມສອດຄ່ອງກັບ ຂໍ້ລິເລີ່ມ: ຄຸນຄ່າ ມາດານີ ຂອງມາເລເຊຍ: ຄວາມຍືນຍົງ, ກວມລວມ ແລະ ຄວາມໃສ່ໃຈ ແລະ ສະແດງການສະໜັບສະໜູນບັນດາເອກະສານທີ່ສຳຄັນຂອງອາຊຽນ ທີ່ ກະກຽມນຳເໜີຕໍ່​ຜູ້ນຳ​ອາ​ຊຽນ ພິຈາລະນາ ຮັບຮອງ ແລະ ຮັບຊາບ ທີ່​ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງ​ທີ 47, ແນໃສ່​ເພີ່ມທະວີ​ເອກະລັກອາຊຽນ, ຄວາມເປັນ​ເອກະ​ພາບ ​ແລະ ຄວາມເຂັ້ມແຂງ.

   ນອກນີ້, ທ່ານລັດຖະມົນຕີ ຍັງໄດ້ມີຄຳເຫັນ ຕື່ມ ວ່າ ບັນດາເອກະສານສຳຄັນເຫຼົ່ານັ້ນ ຈະຊ່ວຍສະໜັບສະໜູນ ແລະ ຊຸກຍູ້ການຮ່ວມມືຂອງທົ່ວທຸກຂະແໜງການ ພາຍໃນເສົາຄ້ຳປະຊາຄົມວັດທະນະທຳ-ສັງຄົມອາຊຽນໃຫ້ເຂັ້ມແຂງຍິ່ງຂຶ້ນ, ສ້າງເງື່ອນໄຂໃຫ້ມີການໄປມາຫາສູ່ຂອງ​ປະ​ຊາ​ຊົນໃຫ້ຫຼາຍຂຶ້ນ, ປັບປຸງຄຸນນະພາບຊີວິດການເປັນຢູ່ຂອງປະຊາຊົນອາຊຽນ ໃຫ້ຢູ່ດີກິນດີ ແລະ ມີຄວາມສະດວກສະບາຍ ສາມາດເຂົ້າເຖິງການບໍລິການສາທາລະນະຢ່າງທົ່ວເຖິງ ເປັນຕົ້ນ ດ້ານການສຶກສາ, ສາທາລະນະສຸກ, ຂໍ້ມູນຂ່າວສານ. ຄຽງຄູ່ກັບການຮັບຮູ້ທາງດ້ານວັດທະນະທໍາ, ສິ່ງແວດລ້ອມ, ຄວາມ​ປ່ຽນ​ແປງ​ຂອງ​ດິນ​ຟ້າ​ອາ​ກາດ, ​ການ ​ເຄື່ອນ​ຍ້າຍແຮງງານ ແລະ ອື່ນໆ.

ພ້ອມນີ້, ທ່ານລັດຖະມົນຕີ ຍັງໄດ້ສະແດງຄວາມເຊື່ອໝັ້ນວ່າ: ບັນດາເອກະສານສຳຄັນເຫຼົ່ານັ້ນ ຈະຊ່ວຍສະໜັບສະໜູນ ແລະ ຊຸກຍູ້ການຮ່ວມມືຂອງທົ່ວທຸກຂະແໜງການ ພາຍໃນເສົາຄ້ຳປະຊາຄົມວັດທະນະທຳ-ສັງຄົມອາຊຽນໃຫ້ເຂັ້ມແຂງຍິ່ງຂຶ້ນ, ສ້າງເງື່ອນໄຂໃຫ້ມີການໄປມາຫາສູ່ຂອງປະຊາຊົນໃຫ້ຫຼາຍຂຶ້ນ, ປັບປຸງຄຸນນະພາບຊີວິດການເປັນຢູ່ຂອງປະຊາຊົນອາຊຽນ ໃຫ້ຢູ່ດີກິນດີ ແລະ ມີຄວາມສະດວກສະບາຍ ສາມາດເຂົ້າເຖິງການບໍລິການສາທາລະນະຢ່າງທົ່ວເຖິງ ເປັນຕົ້ນ ດ້ານການສຶກສາ, ສາທາລະນະສຸກ, ຂໍ້ມູນຂ່າວສານ ຄຽງຄູ່ກັບການຮັບຮູ້ທາງດ້ານວັດທະນະທໍາ, ສິ່ງແວດລ້ອມ, ຄວາມປ່ຽນແປງຂອງດິນຟ້າອາກາດ, ການ ເຄື່ອນຍ້າຍແຮງງານ ແລະ ອື່ນໆ.

      ບົນພື້ນຖານຄຳເຫັນທີ່ກ່າວມາຂ້າງເທິງນັ້ນ, ທ່ານ ນາງ ສວນສະຫວັນ ວິຍະເກດ ຍັງໄດ້ ແລກປ່ຽນຄຳຄິດຄໍາເຫັນ ໃນກອງປະຊຸມຕໍ່ທິດ​ທາງແຜນຍຸດ​ທະ​ສາດຂອງປະຊາຄົມວັດທະນະທຳ-ສັງຄົມອາຊຽນ ຫຼັງ 2025 ໂດຍເນັ້ນໃສ່ບາງ ຈຸດສຳຄັນຄື: (1) ອາຊຽນ ຄວນສືບຕໍ່ເອົາໃຈໃສ່ປະຕິບັດພາລະບົດບາດຂອງແຕ່ຂະແໜງການຢ່າງກົມກຽວບໍ່ພຽງແຕ່ພາຍໃນເສົາຄໍ້າວັດທະນະທຳ-ສັງຄົມ ແຕ່ລວມທັງເສົາຄ້ຳອື່ນໆ ເພື່ອຮັບປະກັນກົນໄກການປະສານງານ ທີ່ມີປະສິດທິພາບ ແນໃສ່ຈັດຕັ້ງປະຕິບັດບັນດານະໂຍບາຍທີ່ເປັນຍຸດທະສາດລະດັບ ພາກພື້ນ ກໍຄື ການຈັດຕັ້ງຜັນຂະຫຍາຍແຜນຍຸດທະສາດປະຊາຄົມວັດທະນະທຳ-ສັງຄົມອາຊຽນ ຫຼັງປີ 2025 ໃຫ້ເກີດຜົນປະໂຫຍດສູງສຸດໃຫ້ແກ່ປະຊາຊົນພວກເຮົາ; (2) ອາ​ຊຽນ ຄວນສົ່ງເສີມ​ບັນດາ​ຂໍ້​ລິ​ເລີ່​ມ ທີ່ຊຸກຍູ້ການເປີດ​ປະຕູ​ສູ່​ຕະຫຼາດ ​ແລະ ໂອກາດແຫ່ງການຈ້າງງານ ໂດຍສະເພາະຊາວໜຸ່ມ ດ້ວຍການຍົກລະດັບຄວາມອາສາມາດ, ທັກສະ ແລະ ທາງນະວັດຕະກຳ ເພື່ອສະໜັບສະໜູນການພັດທະນາແຮງງານໃນພາກພື້ນໃຫ້ມີຄຸນນະພາບຍິ່ງຂຶ້ນ; ແລະ (3) ອາ​ຊຽນ ຄວນ​ສືບຕໍ່ຢ່າງຕັ້ງໜ້າ​ສົ່ງເສີມ ​ສິດທິ​ພື້ນຖານ ແລະ ສະຫວັດດີການ​ໃຫ້ແກ່ກຸ່ມຄົນດ້ອຍໂອກາດ ເປັນຕົ້ນແມ່ນ​ຄົນເສຍອົງຄະ, ຜູ້​ສູງ​ອາຍຸ, ​​ແມ່ຍິງ ແລະ ເດັກນ້ອຍ ​ເພື່ອ​ປົກປ້ອງຈາກການໃຊ້ຄວາມຮຸນແຮງ, ສົ່ງເສີມ​ຄວາມ​ສະ​ເໝີ​ພາບ ​ແລະ ມີຄວາມ​ປອດ​ໄພ, ກວມລວມ ແລະ ສາມັກຄີເປັນຈິດໜຶ່ງໃຈດຽວ ຢູ່ໃນປະຊາຄົມອາຊຽນ.