ໜ້າຫຼັກ / ລາຍການຂໍ້ມູນ / ລາຍລະອຽດຂ່າວ
ຂປລ. ວັນທີ 9 ມັງກອນ 2023 ນີ້, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຕ້ອນຮັບ ທ່ານ ດິນກາ ອັສທານ (Dinkar Astnan) ເອກອັກຄະລັດຖະທູດ ອິນເດຍ ປະຈໍາ ສປປ ລາວ ເຂົ້າຢ້ຽມຂໍ່ານັບອໍາລາ, ພາຍຫລັງສິ້ນສຸດວາລະການປະຕິບັດໜ້າທີ່ຢູ່ ສປປ ລາວ.
ໂອກາດນີ້, ທ່ານລັດຖະມົນຕີກະຊວງ ຖວທ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ບັນດາຜົນງານຂອງທ່ານທູດ ໃນຕະຫລອດໄລຍະການປະຕິບັດໜ້ທີ່ການທູດຢູ່ ສປປ ລາວ, ອັນໄດ້ປະກອບສ່ວນສໍາຄັນເຂົ້າໃນການເສີມສ້າງສາຍພົວພັນ ແລະ ການຮ່ວມມືລະຫວ່າງລາວ ແລະ ອິນເດຍ ໃຫ້ນັບມື້ດີຂຶ້ນ. ພ້ອມທັງ ອວຍພອນໃຫ້ທ່ານທູດເດີນທາງກັບຄືນປະເທດ ດ້ວຍຄວາມສະຫວັດດີພາບ ແລະ ໃຫ້ມີຜົນສໍາເລັດໃນໜ້າທີ່ອັນໃໝ່ທີ່ມີກຽດຂອງທ່ານ.
ໂອກາດດຽວກັນນີ້, ທ່ານທູດ ອິນເດຍປະຈຳລາວ ກໍໄດ້ສະແດງຄວາມຂອບໃຈຢ່າງຈິງໃຈຕໍ່ທ່ານລັດຖະມົນຕີກະຊວງ ຖວທ ທີ່ໄດ້ຕ້ອນຮັບໃນຄັ້ງນີ້, ພ້ອມທັງລາຍງານສະພາບການເຄື່ອນໄຫວ ແລະ ການປະຕິບັດໜ້າທີ່ອັນພົ້ນເດັ່ນຂອງຕົນ ຢູ່ ສປປ ລາວ ໃນໄລຍະຜ່ານ ໂດຍສະເພາະແມ່ນບັນດາແຜນງານ ແລະ ໂຄງການຮ່ວມມືຕ່າງໆ ລະຫວ່າງ ອິນເດຍ ແລະ ສປປ ລາວ ທີ່ໄດ້ຮ່ວມມືກັນຈັດຕັ້ງປະຕິບັດໃນໄລຍະຜ່ານມາ ໂດຍສະເພາະວຽກງານໃນຂົງເຂດວັດທະນະທໍາ ຈົນມີຜົນສໍາເລັດເປັນກ້າວໆ.
ຂ່າວ: ສຸພາສະຫວັນ
ພາບ: ອ່າຍຄຳ
