ໜ້າຫຼັກ / ລາຍການຂໍ້ມູນ / ລາຍລະອຽດຂ່າວ

ຖວ​ທ ໄດ້​ຈັດ​ກອງ​ປະ​ຊຸ​ມ​ພົບ​ປະ​ ກັບ ແຂວງຈຳປາສັກ ເພື່ອຊຸກຍູ້ ແລະ ສົ່ງເສີມການຮ່ວມມື ໃນຂົງເຂດວຽກງານ ຖວທ

11 May 2022 | (ຂ່າວ-ພາບ: ບຸນຕອມ) |

      ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວ​ທ) ໄດ້​ຈັດ​ກອງ​ປະ​ຊຸ​ມ​ພົບ​ປະ​ກັບ ແຂວງຈຳປາສັກ ເພື່ອຊຸກຍູ້ ແລະ ສົ່ງເສີມການຮ່ວມມື ໃນຂົງເຂດວຽກງານ ຖວທ ​ຂຶ້ນ​ໃນວັນທີ 11 ພຶດສະພາ ນີ້ ທີ່ກະ​ຊວງ​ດັ່ງ​ກ່າວ ໂດຍການເປັນປະທານຮ່ວມຂອງ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ​ມີ​ພະ​ນັກ​ງານ​ທີ່​ກ່ຽວ​ຂ້ອງເຂົ້າຮ່ວມ.

    ທ່ານ  ນາງ ສວນສະຫວັນ ວິຍະເກດ ໄດ້ລາຍງານໂດຍຫຍໍ້​ວ່າ: ສໍາລັບວຽກງານຖະແຫຼງຂ່າວ ໄດ້ສຸມໃສ່ການໂຄສະນາເຜີຍແຜ່ແນວທາງນະໂຍບາຍຂອງພັກ-ລັດ, ການພັດທະນາເສດຖະ ກິດ-ສັງຄົມ, ບັນດາມະຕິ, ຄຳສັ່ງ ແລະ ແຈ້ງການທີ່ລັດຖະບານວາງອອກໃນແຕ່ລະໄລຍະ, ຕິດຕາມ ຊຸກຍູ້-ປັບປຸງພື້ນຖານໂຄງລ່າງ ເຕັກນິກສະຖານນີວິທະຍຸ-ໂທລະພາບ ຢູ່ທັງສູນກາງ ແລະ ທ້ອງຖິ່ນ, ການຂະຫຍາຍໂທລະໂຄ່ງຢູ່ບ້ານເປົ້າໝາຍ ໃຫ້ໄດ້ຕາມຄາດໝາຍທີ່ສະພາຮັບຮອງ ໄປຄຽງຄູ່ກັບການຕິດຕາມຫາງສຽງສັງຄົມຜ່ານສື່ອອນລາຍຢ່າງເປັນປົກກະຕິ. ວຽກງານວັດທະນະທຳອົາໃຈໃສ່ ຊຸກຍູ້ຂະບວນການສ້າງບ້ານ ແລະ ຄອບຄົວວັດທະນະທຳ, ການຄຸ້ມຄອງມໍລະດົກໂລກ ແລະ ມໍລະດົກແຫ່ງຊາດ, ສົ່ງເສີມສິລະປະວັດທະນະທຳບັນດາເຜົ່າ ໂດຍສະເພາະການນຳສະເໜີເອົາອຸທິຍານແຫ່ງຊາດ ຫີນໜາມໜໍ່ ແຂວງຄໍາມ່ວນ ເຂົ້າເປັນມໍລະດົກໂລກ, ພ້ອມທັງຍົກລະດັບດໍາລັດວ່າດ້ວຍ ວິຈິດສິນ ມາເປັນກົດໝາຍ ວ່າດ້ວຍ ວິຈິດສິນ ທີ່ກຽມເຂົ້າຜ່ານກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ. ວຽກງານທ່ອງທ່ຽວ ໄດ້ສຸມໃສ່ກະຕຸກຊຸກຍູ້ບັນດາຫົວໜ່ວຍທຸລະກິດການທ່ອງທ່ຽວ, ປັບປຸງສະຖານທີ່ທ່ອງທ່ຽວ ເພື່ອຮັບຕ້ອນນັກທ່ອງທ່ຽວ ທັງພາຍໃນ ແລະ ຕ່າງປະເທດ ໄປພ້ອມກັບການຈັດຕັ້ງປະຕິບັດໂຄງການ ການທ່ອງທ່ຽວປອດໄພ (TLao safe) ແລະ ການໂຄສະນາການ ທ່ອງທ່ຽວ “ລາວທ່ຽວລາວ”.

     ສຳ​ລັບການມາເຄື່ອນໄຫວພົບປະຢ້ຽມຢາມ ​ຂ​ອງ​ການນຳແຂວງ​ຈຳ​ປາ​ສັກ​ໃນຄັ້ງນີ້ ຖືເປັນແຂວງທໍາອິດ ຈຶ່ງເປັນຂີດໝາຍທີ່ມີຄວາມສໍາຄັນຕໍ່ການເສີມຂະຫຍາຍການຮ່ວມມື ລະຫວ່າງສູນກາງ ແລະ ທ້ອງຖິ່ນ, ເວົ້າສະເພາະ ແມ່ນ ກະຊວງ ຖວທ ກັບ ແຂວງຈຳປາສັກ, ເຊື່ອໝັ້ນວ່າການພົບປະຢ້ຽມຢາມໃນຄັ້ງນີ້ ຈະເຮັດໃຫ້ການຮ່ວມມື ພັດທະນາວຽກງານດ້ານຕາງໆໃນຂົງເຂດ ຖວທ ໃຫ້ດີຂຶ້ນເທື່ອລະກ້າວ.

      ທ່ານ ວິໄລວົງ ບຸດດາຄໍາ ໄດ້ສະແດງຄວາມຂອບໃຈຢ່າງສູງ ມາຍັງຄະນະພັກ, ຄະນະນຳ ກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ ທີ່ໄດ້ໃຫ້ການສະໜັບສະໜູນຊ່ວຍເຫຼືອດ້ານຕ່າງໆ ແກ່ແຂວງຈຳປາສັກ ໃນວຽກງານຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ, ໄດ້ຊ່ວຍຊຸກຍູ້ສົ່ງເສີມເຄື່ອງດົນຕີພື້ນເມືອງ ແລະ ວຽກງານສ້າງຄອບຄົວ ແລະ ບ້ານວັດທະນະທຳ ແລະ ກະຊວງ ຖວທ ໄດ້ຊ່ວຍດຶງທຶນສະໜັບສະໜູນຈາກທະນາຄານພັດທະນາອາຊີ ມາຊ່ວຍວຽກງານທ່ອງທ່ຽວແຂວງ ໂດຍສະເພາະໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວ ລວມມີການປັບປຸງເສັ້ນທາງເຂົ້າບ້ານນາກາສັງ - ທ່າເຮືອ, ທາງດອນເດດ-ດອນຄອນ ແລະ ອຸປະກອນຮັບໃຊ້ວຽກງານວິຊາການອື່ນໆອີກຈຳນວນໜຶ່ງ, ຜ່ານທຶນສະໜັບສະໜູນຈາກທະນາຄານພັດທະນາອາຊີ, ຊ່ວຍອຸປະກອນຮັບໃຊ້ວຽກງານວິຊາການເຂົ້າໃນສູນ ແລະ ຫ້ອງຂໍ້ມູນຂ່າວສານຂອງແຂວງ, ນອກຈາກນີ້ກໍໄດ້ຊ່ວຍຍົກລະດັບໃນດ້ານວິຊາການຕ່າງໆທີ່ຕິດພັນກັບວຽກງານ ຖວທ.

    ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ ປີ 2021, 3 ເດືອນຕົ້ນປີ 2022 ແລະ ທິດທາງແຜນການ ປະຈຳປີ 2022 ແລະ ການຈັດຕັ້ງປະຕິບັດ  2 ວາລະແຫ່ງຊາດ. ເຫັນໄດ້ວ່າ ການພັດທະນາເສດຖະກິດ-ສັງຄົມ ຂອງ ແຂວງຈຳປາສັກ ມີລັກສະນະບຸກທະລຸຫຼາຍດ້ານ ແລະ ການພົບປະຄັ້ງນີ້ ຈະເປັນການຊຸກຍູ້ ສົ່ງເສີມການຮ່ວມມືແບບມີຈຸດສຸມ ລະຫວ່າງ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກັບ ແຂວງ ຈໍາປາສັກ ແນໃສ່ການຜັນຂະຫຍາຍ ແລະ ຈັດຕັ້ງປະຕິບັດແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ, ແຜນຍຸດທະສາດການພັດທະນາວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຢູ່ແຂວງຈຳປາສັກ ໃຫ້ມີປະສິດທິຜົນສູງ.

ຂ່າວຫຼ້າສຸດ

ວຽກງານເສນາ

ກະຊວງ ຖວທ ເຜີຍແຜ່ເອກະສານ ສຳຄັນ ຂອງລັດຖະບານ

  • 15 Aug 2022
  • ຂ່າວ;ພາບ: ກິດຕາ

   ຂປລ. ກະຊວງຖະແຫລງຂ່າວ ວັດທະນະທຳ...

ອ່ານເພີ່ມຕື່ມ

ວຽກງານຖະແຫຼງຂ່າວ

ກອງ​ປະ​ຊຸມ​ແລກ​ປ່ຽນ​ວຽກງານ​ສື່ມວນ​ຊົນ​

  • 11 Aug 2022
  • ຂ່າວ​-ພາບ: ບຸນ​ອູ້ມ

   ...

ອ່ານເພີ່ມຕື່ມ

ວຽກງານເສນາ

ກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເປີດຝຶກອົບຮົມທິດສະດີການເມືອງ-ການປົກຄອງໄລຍະສັ້ນ 45 ວັນ ຊຸດທີ XII

  • 09 Aug 2022
  • (ຂ່າວ-ພາບ: ວັນເພັງ)

     ກະຊວງ ຖະແຫຼງຂ່າວ, ວັດທະນະທໍາ...

ອ່ານເພີ່ມຕື່ມ

ວຽກງານວັດທະນະທໍາ

ເປີດສັບປະດາວັດທະນະທຳ ຫວຽດນາມ ສະຫລອງປີສະມັກຄີມິດຕະພາບ ລາວ-ຫວຽດນາມ

  • 19 Jul 2022
  • ຂ່າວ: ທະນູທອງ ພາບ: ຂັນໄຊ

       ຂປລ. ກະຊວງ...

ອ່ານເພີ່ມຕື່ມ